PIA Press Release
Friday, January 27, 2012 Cebuano News: Dugang mga volunteers alang sa ‘Bayanihan ng Bayan’ padayong gipanawaganby Boy Decena ILIGAN CITY, Lanao del Norte, Jan. 27 (PIA) -- Padayong nanawagan karon si Unang Ginang Gina Sue Macapayag Cruz og dugang mga ‘volunteers’ alang sa “Bayanihan ng Bayan: Anong Taya Mo sa Bayan?” nga ipahigayon didto sa Sta. Elena Relocation Site sugod sa Enero 25. Kini mao ang hugop nga pagtukod og kapin tres mil ka mga balay alang sa mga pamilya nga nawad-an og kapuy-an tungod sa baha nga nahitabo sa Iligan niadtong miaging bulan. Aktibo ang unang ginang sa maong kalihukan isip mao’y gitahasan ni Mayor Lawrence Lluch Cruz nga mangulo sa Gawad Kalinga Bayani Challenge nga una nang natakda sa Abril niining tuiga bisan sa wala pa ang kalamidad. Nag-awhag si Cruz sa mga interesadong mo-boluntaryo sa pagpalista didto sa ikaduhang andana sa Gerona Town Center nga anaa sa Hinaplanon Highway duol sa Mandulog Bridge 2. Hinoon, sumala pa, nagsugod na pagsingabot sa Iligan ang mga volunteers gikan sa laing mga dapit ug gilauman nga moabot kini sa tres mil ngadto sa singko mil ka mga tawo. Ang maong ‘shelter build’ mao’y magsimbolo sa panagtambayayong sa tanang sektor sa dakbayan, sa nasud ug sa tibuok kalibutan nga mahitabo dinhi mismo sa Iligan. Gani usa nang gi-deklara sa konseho ang maong adlaw nga “Iligan City Day of Volunteerism and Solidarity”. (CIO/PIA-10) | 
