PIA Press Release
Friday, January 27, 2012 Hiligaynon News: Madamo nga estudyante sa Capiz ginabuligan sang gobyernoni Jemin B. GuillermoSYUDAD SANG ROXAS, Capiz, Enero 27 (PIA6) -- Kapin sa 675 ka mga estudyante sa high school sa Filamer Christian University sa probinsya sang Capiz ang nabuligan sang nasyonal nga panguluhan sa ila pagtuon. Ginpahayag ni FCU Guidance Counselor Phoebe Santiago nga kapin sa P3.641 milyones ang ginhatag nga bulig sang nasyonal nga pamunuan pinaagi sa Department of Education para sa ila mga estudyante kag manunudlo sa high school para sa sini nga school year. Ang amo nga bulig pinansyal ang ginasaad sa idalum sang programa nga Government Assistance to Students and Teachers in Private Education (GASTPE), sa diin tinutuyo sini nga mabuligan ang mga kabataan nga wala na sang padulungan kondi ang mga pribado na lamang nga buluthuan bangod sa kadamuon na sang mga estudyante sa pampubliko nga eskwelahan. Suno man sa iya nga sa 675 ka mga estudyante, 13 sini nga mga first year high school ang wala na mahatagan sang pundo sa amo nga programa ang ginpakamaayo sang mga ginikanan sang mga estudyante nga benepisyaryo diri nga mag-amutay agod igabulig sa nasambit nga 13 ka kabataan. Suno pa kay Santiago nga amo man ang coordinator sang FCU sa amo nga programa nga ang programa nga GASTPE ang nagbulig na sa ila mga estudyante sa sulod na sang pito ka tuig. Daku naman ang pagpasalamat sang mga ginikanan sang nasambit nga mga estudyante sa gobyerno nasyonal bangod sa bulig agod mapadayon ang pag-eskwela sang ila kabataan. Sa idalum sang GASTPE, ang tagsa ka kwalipikado nga estudyante sa high school sa amo nga buluthuan ang ginahatagan sang P5,500 tagsa ka tuig agod bulig sa ila gina abaga nga balayaran ukon tution kag miscellaneous fees. (JSC/JBG-PIA6 Capiz) | 
