PIA Press Release
Tuesday, January 31, 2012 Hiligaynon news: Alert Level sa Yemen napanubo sa level 2 – DFAMANILA, Enero 31 (PIA) -- Ang Department of Foreign Affairs (DFA) nagpahayag nga aprobado na ni Pangulong Benigno S. Aquino III ang rekomendasyon nga panuboan ang Alert Level sa Yemen halin sa Alert Level 4 ukon mandatory repatriation sa Sana’a kag Alert Level 3 ukon voluntary repatriation sa iban nga bahin sang Yemen panubo sa Alert Level 2 ukon restriction phase sa bug-os nga pungsod agud ma-reflect ang sitwasyon didto sa karon.Ang DFA sa gilayon nagpalab-ot sa Department of Labor and Employment (DOLE) kag sa Philippine Overseas Employment Administration (POEA) Governing Board tuhoy sa amo nga development pagkatapos mahibalo-an ang pag-aprobar ni Presidente Aquino sang amo nga rekomendasyon. “Aton ginapaabot nga sa pagnubo sang alert level, ang redeployment sang manugbalik nga mga overseas Filipino workers (OFWs) sa Yemen ang pahanugotan na sa karon. Aton man ginapaabot nga ang Yemen-based OFWs, nga gusto magbalik sa Pilipinas agud magbakasyon, ang pahanugotan man nga magbalik sa Yemen,” ang siling ni Foreign Affairs Secretary Albert F. del Rosario. Ang pagnubo sang alert level wala nagalakip sang deployment sa Yemen sang newly-hired OFW. Ang DFA naga-ekspektar nga ang POEA Governing Board maga-isyu sang bag-o nga resolution nga magatugot sa deployment sang returning OFWs sa Yemen. Ang DFA nagpataas sang alert level 3 sa bug-os nga Yemen sang Mayo 24 kag alert level 4 sa Sana’a sang Hunyo 6, kag nagmandu sa mga Pilipino nga gusto magkuha sang repatriation facility sang Embahada agud maghalin sa lugar bangod sang sitwasyon sa politica kag seguridad didto. (LCR-PIA 6) | 
