PILI, Camarines Sur (13 February) -- Si Presidente Gloria Macapagal Arroyo gikatakda nga mamahimong pinasidunggang dinapit pagbukas sa 2nd General Assembly sa panagtigom sa mga Gobernador sa nasud dinhing dapita karong adlawa, Pebrero 13.

Sa samang higayon, paga-unhan niya ang paghimo og mga groundbreaking ug inauguration sa lain-laing mga school building ug infrastructure projects.

Gilauman nga moabot ang Pangulo alas 10:00 karong buntag ug motugpa didto sa Naga Airport sa San Jose, ning lungsora, diin siya pakig-sultihan sa mga kadagkoan sa Armadong Kusog ug kapolisan mahitungod sa peace and order nga kahimtang sa Camarines ug sa uban pang dapit sa Rehiyon 5.

Dayon mopa-ingon siya sa Camarines Sur Watersports Complex (CWC) alang sa usa ka hamubo nga declaration rites sa usa ka unom ka ektaryang yuta nga mao unyay mosunod nga "cable skiing Mecca of Asia," kay duna kini six-point cable ski system.

Karong tali-abot nga bulan sa Hulyo karong tuiga, ang CWC maoy mopahigayon sa World Wakeboarding Championship, ang labing una nga matang sa maong kalihokan dinhi sa nasud.

Gikan sa CWC, ang Presidente moadto na sa Provincial Capitol Compound sa Cadlan alang sa iyang pamahayag atubangan sa 2nd General Assembly sa League of Provinces of the Philippines (LPP) didto sa Villa del Rey.

Si Camarines Sur Gov. Luis Raymund Villafuerte maoy mo-host sa usa ka salo-salo nga paniudto alang sa mibisitang Presidente, apil na ang sobra sa 80 ka buok mga Gobernador ug uban pang mga opisyales sa gobyerno, lakip na si Budget Secretary Rolando Andaya, ug si Cong. Dato Arroyo.

Sa barangay Pandan, Cabusao, ang Presidente magpasiugda sa groundbreaking rites alang sa P 60-million Sipocot-Cabusao road construction and improvement project.