By Rodrigo S. Victoria

Manila (19 February) -- Si Presidente Gloria Macapagal Arroyo mi-inagurar kagahapong adlawa sa bag-ong gipalapdan ug gibag-o nga upat ka agianan nga Labangan Bridge isip kaparte sa kinatibuk-ang plano sa pagpalambo sa daloy sa trapiko subay sa daan nga Manila North Road ug sa pagpaluag sa Metro Manila.

Ang Presidente miabot kagahapon sa alas-11:00 sa buntag ug nanguna sa pagbukas sa marker ug sa pasiunang pag-agi sa Labangan Bridge No. 7 nga kaniari gamay nga duha ka agianan ang kalapad ug ang pinakaguba sa pito ka Labangan Bridges ubay sa Manila North Road, nga karon naila nga MacArthur Highway.

Ang paghimo sa upat ka linya, 127 ka metros nga tulay nga nagkantidad ug P120 ka milyon kaparte sa padayon nga pagpalapad ug pagpalambo sa Manila North Road section gikan sa Meycauayan City sa Bulacan ngadto sa Tarlac aron sa pagpaluag sa North Luzon nga bahin ug sa paghatag ug daghan nga pag-agi sa mga behikulo gikan sa North Luzon Expressway.

Sa sayo pa, ang Presidente usab nanguna sa groundbreaking sa duha ka andana, upat ka lawak nga tulunghaan nga edepisyo nga makabenepisyo sa mokabat ug 1,600 ka mga batang nagtungha sa Bangkal Resettlement Site Elementary School sa Barangay Taal, Malolos City.

Ang pagtukod sa Labangan Bridge No. 7 sa Calumpit ug sa P4 ka milyon nga proyekto sa tulunghaan sa Malolos ubos sa P200 ka bilyon nga pagsaka sa galastusan sa inprastraktura nga gianunsyo sa Presidente sa sayo pa aron sa pagpakgang sa mga epekto sa hadla sa pagluya sa kalibutanong ekonomiya ug sa pagpadayon sa pagtubo sa ekonomiya sa nasud.

Ang duha ka andana nga Bangkal Resettlement Site Elementary School kaparte sa 10,000 ka mga lawak tulunghaan nga gipunting alang pagatukoron sa administrasyong Arroyo karong tuiga kalinya sa slogan sa Presidente nga "Labanan ang kahirapan, isulong ang karunungan."

Ang Presidente mainiton nga gisugat sa mga residente nga ningkaway-kaway sa mga bandera ug mga estudyante sa Malolos ug Calumpit ug sa pagpakita sa pwersa sa mga opisyales sa probinsya nga gipanguluhan ni Gov. Joselito Mendoza, Vice-Gov. Wilhelmino Alvarado, 1st District Rep. Ma. Victoria Alvarado, 2nd District Rep. Pedro Pancho, 3rd District Rep. Lorna Silverio, 4th District Rep. Reylina Nicolas, Malolos City Mayor Danilo Domingo ug Calumpit Mayor James de Jesus..