Cebuano News: Palasyo malaomon madus-og ang eleksyon sa ARMM
By Lanie Pitao-Tupaz
Manila (4 August) -- Sa pito ka adlaw nga nahibilin usa pa ang eleksyon sa Autonomous Region of Muslim Mindanao kon ARMM karong umaabot Agosto 11, malaomon pa gihapon ang Malacanang nga madus-og pa kini nga eleksyon.
Sukwahi sa mga opinion sa mga kritiko sa gobyerno nga nahadlok ang palasyo sa Moro Islamic Liberation Front kon MILF, Si Press Secretary Jesus Dureza miingon nga walay makapahadlok sa gobyerno bisan pa ang MILF. Ang gusto lamang ni Presidente Gloria Macapagal-Arroyo mao ang pagseguro sa halapad nga konsultasyon pinaagi sa plebesito nga nakasaad sa memorandum of agreement kon MOA nga pagalagdaan ugma nga adlaw tale sa gobyerno ug sa MILF.
Ang MOA nga pagalagdaan ugma dili pa mao ang peace agreement kundili magtalaan lamang kini sa plebesito nga ipahigayon sulod sa 12 ka buwan gikan kini malagdaan.
Ang plebesito maglakip usab sa konsultasyon kung mosugot ba ang katawhan nga mahilakip ang ilang local government units ubos sa gipalawak nga ARMM o Bangsa Moro juridical area.
Si Dureza miingon nga kung mahinayon ang eleksyon karong umaabot Agosto 11, ang mga mapiling opisyales magkupot sa katungdanan sulod sa tulo ka tuig. Sa higayon nga mahinayon ang eleksyon, dili na puwedeng putlon ang termino sa mga mapiling opisyales sanglit si Presidente Arroyo nagpabiling malaomon nga mosuporta ang Senado sa pagdus-og sa maong eleksyon.
Si Presidente determinado gayod sa iyang mga desisyon nga makahatag ug kaayohan sa katawhan sa hataas nga panahon bisan pa man ug dili kini madayeg sa katawhan sa pagka karon. Apan sa higayon nga matagamtaman na sa katawhan ang malungtarong kaayohan sa iyang mga desisyon karon, anha pa siya masabtan sa katawhan, dugang pa ni Dureza. (PIA Biliran) [top]
