Ilocano News: Kuwait, agkasapulan 1 a milyon nga Pilipino a trabahadores
Ni Jessie R. Valdez
Manila (19 August) -- Kadagidiay mayat nga mapan agtrabaho sadiay Kuwait, impaka-ammo ni Kuwait Prime Minister Sheik Nasser Al Mohammad Al Ahmad Al Sabah nga agkasapulan iti agarup maysa a milyon nga Pilipino a trabahador kas nurses, dodoktor ken inhinyero nga mangimplimentar kadagiti adu nga proyektos da sadiay.
Iti kaadda na ditoy Pilipinas iti tallo nga aldaw, pabilgen na ti inda panagkaddua iti Pilipinas ken dadduma pay a nasnasyon ta implantar na ti siyam nga aldaw inna panagbisita iti Asya.
Malaksid ti panangipaka-ammo na ti kasapulan na a maysa a milyon nga trabahador, naimatangan da a dua ken Presidente Gloria Macapagal-Arroyo ti panag-pinnirma iti tallo nga reglamento maipanggep programa ti salun-at, turismo ken enerhia.
Nangisyuswat pay ti Kuwait iti sangapulo ket lima a tawen para iti limapulo a bilyon a dolyar a pangdebelop ti container port, railway system, lima a babbaro a siyudad ken para rang-rangtay.
Iti agdama, sangagasut ket tallopulo a ribu ti OFW nga adda sadiay Kuwait ket isu ti maikatlo a kadadakkelan nga nasyon nga adu a Pilipino ti agtrabtrabaho sadiay Middle East.
Kadagitoy a tulong ti Kuwait iti Pilipinas, impeksa ni PGMA ti panagyaman na kas kunana a ti nasao nga lugar ket isu ti umuna nga nasyon nga Arabo a nagpautang para kadagiti proyekto ti Pilipinas babaen ti pannaka-aramid ti 150-kilometer highway a mangporma ti dalan mapan Pagadian city ken dadduma pay a parte ti Mindanao.
Agtultuloy daytoy funding assistance na nga $20 milyon a dolyar tapno maituloy dagiti programa a pagsayaatan ti Mindanao ket daytoy bigbigen ti Arroyo administration a dakkel a tulong para iti peace process nga isu a madama a tamtamingen ti gobierno. (PIA LA Union) [top]
