Manila (29 August) -- Ipadayon gyud sa gobyerno ang paggukod sa mga badlongon nga grupo sa Moro Islamic Liberation Front (MILF) bisan hangtud sa pagsaulog sa Ramadan sugod Septembre 1-30, ang Malacanang namahayag kagahapon.

Gitataw hinoon ni Executive Secretary Eduardo Ermita nga magpabilin gihapon nga ipa-tuman ang ceasefire sa Mindanao bisan kun padayon ang opensiba.

Ang tuyo sa military operations, matud ni Ermita, mao ang pagdakop sa mga lider sa MILF nga sila Kumander "Umbra Kato" ug "Kumander Bravo" diin gikataho nga mao'y responsable sa pagpangsunog ug kabalayan sa pipila ka mga barangay didto sa Mindanao ug ang pagpamatay ug pipila ka mga sibilyan, lakip na mga kabataan ug kababayen-an.

Subling gipamahayag ni Presidente Arroyo sa milabay nga Martes nga ang gihimo sa badlongong grupo nagkinahanglan ug makusganong aksyon militar.

Matud sa pangulo nga ang paghatag ug P10-million nga patong sa ulo nilang Kato ug Bravo nagpakita sa pagpangusog sa gobyerno nga madali ang pagsikop sa maong mga kriminal aron mahatagan ug hustisya ang ilang mga biktima ug aron nga makapadayon na ang nasud pagpahigayon ug pakigsabot-sabot tumong sa kalinaw.

Kung kahinumduman, ang grupo ni Kato mihimo'g pagpanghasi sa pipila ka mga barangay sa North Cotabato hinungdan sa pagpamakwit sa gatusan ka mga sibilyan.