Hiligaynon News: Pangulong Arroyo magapakigbahin sa National Prayer Breakfast sa US
by Jemin B. Guillermo
Manila (4 February) -- Magapakigbahin si Pangulong Gloria Macapagal-Arroyo sa isa ka National Prayer Breakfast sa Estados Unidos buas nga adlaw.
Suno sa kay Press Secretary Cerge Remonde nga ginbaton na ni Pangulong Arroyo ang pagpangagda sang mga mamalidha sang US para sa isa ka National Prayer Breakfast nga pagahiwaton sa Washington D.C. buas nga adlaw.
Sa sini nga kahiwatan ginalauman ang labing una nga pagkitaay ni Pangulong Arroyo kag Pangulong Barack Obama sang Estados Unidos.
Ang National Prayer Breakfast isa ka tuigan nga kahiwatan sa Washington D.C. tagsa a nahauna nga Huwebes sa bulan sang Pebrero. Subong nga tuig, ini pagahiwaton buwas, Pebrero 5.
Suno pa sa kay Remonde nga ang National Prayer Breakfast gindihon bilang isa ka tion para sa mga lideres sang punsod sa paghinun-anon tuhoy sa isyu politika, sosyal kag pangnegosyo lakip man ang pagpabakod sang relasyon sang mga pungsod.
Ang amo nga kahiwatan nga ginsuguran pa sang tuig 1935 ang nagalakip sang mga hinun-anon, panyaga kag panyapon kag ginatambungan sang kapin 3,500 ka mga dinapit nga bisita nagikan sa 100 ka mga pungsod.
Nahibaluan nga si Frank Carlson nga sadto nangin kongresista, gobernador kag senador sang US ang founder sang National Prayer Breakfast.
Samtang, natalana nga magabalik sa Pilipinas si Pangulong Arroyo sa maabot nga Sabado. (PIA) [top]
