Cebuano News: PGMA mitagana ug P1-B pondo alang sa nawaning OFWs
by Rizalie A. Calibo
Siquijor (9 February) -- Gisaad sa Pangulong Gloria Macapagal-Arroyo nga tabangan sa pangagamhanan ang mga nawad-an ug trabaho pinaagi sa usa ka bilyong pondo alang sa mga nawaning Overas Filipino Workers.
Matud sa Pangulo, ang maong inisyal nga pondo gitagana aron pagsuporta sa kapanginabuhian kon livehood support niadtong mga OFWs nga nawad-an ug trabaho.
Ang P1 bilyon nga pondo, sumala pa niya, maggagikan sa Overseas Workers Welfare Administration (OWWA) ug sa uban pang government lending institutions sama sa Development Bank of the Philippines (DBP) ug Land Bank of the Philippines (LBP).
Ang Pangulo nagtahas usab sa sa Department of Labor and Employment (DOLE) sa pag-implementar ug mga simpleng programa alang sa mga nawad-an ug trabaho sa gawas.
Matud pa niya ang DOLE ug OWWA kinahanglan mao ang mangulo sa pag-implementar ug mga programa sa gobyerno alang sa mga mamumuong Pilipino sa gawas sa nasud uban sa pakiglambigit sa mga ahensya nga adunay kalabutan sa livelihood assistance program sama sa Department of Trade and Industry (DTI) ug sa Department of Agriculture (DA). (PIA) [top]
