Waray-Waray News: PGMA naghatag hin mga pitad nga makakabulig ha mga industriya ug ha katawhan ha butnga han krisis pankalibutan
By Alice Nicart
Manila (10 Pebrero) -- Iginhayag yana hi President Gloria Macapagal-Arroyo in mga pamaagi nga sadang makabulig han daw naghihimaroydoy nga mga industriya ha nasud durot han nagkukure nga ekonomiya han bug-os nga kalibutan lakip na adton damo nga trabahante nga nagkalalaknit ha ira mga trabaho tikang han pagsirra han ira mga kompanya.
Ha Heroes Hall han Malacanang, diin naghatag hiya han iya keynote speech han multi-sectoral jobs summit, ginbul-iwan han iya mga im-imin in pira nga mga estratehiya han goberno, agud maiban-ibanan an epekto ha katawhan han krisis.
Usa dinhe an dire nala pagpabayda han mga nagpakautang ha SSS hin mga porsento ug penaledad tungod la kay waray na hira pakakabayad. Ikaduha, an pagpaibani hin mga kabaraydan para hadton mga mag-aabre hin negosyo ug an pag-alutagahe hin pondo nga salapi han mga nagkawawarayan trabaho nga mga seamen ug mga OFWs nga sadang nira igtikang hin gutiay nga negosyo.
Ginmanduan daw ni Pres. Arroyo an DOLE nga maggahin hin pondo para han paghag-id hin mga nagkakabalik nga mga OFWs para hira magpadugang han ira mga kabatiran, o igkapital hin negosyo. Mayda daw naabot hin usa ka bilyon nga salapi an igin-aandam han DOLE. (PIA-Eastern Samar) [top]
