Hiligaynon News: Proyekto sa enerhiya kag palibot magadugang sa palamognan
by Jemin B. Guillermo
Roxas City (10 February) -- Ang tanan nga mga proyekto sang gobyerno sa environment kag enerhiya sa idalom sang Emergency Employment Program ukon EEP igadihon sa paghimo sang ginatawag "Green Collar Jobs."
Suno sa kay Pangulong Gloria Macapagal-Arroyo, ang pagbaton sang mga trabahador para sa green collar jobs ang makabulig pabakod sa ekonomiya sa idalom sang P330 ka billion nga Economic Resiliency Plan (ERP) sang gobyerno.
Kalakip sa pagabatunon nga mamomogon sa idalom sang P2 ka bilyon nga pundo ang para sa reforestation katulad sa kabukiran sang Bukidnon, Cagayan de Oro, Lanao del Sur ukon sa mga bakawan nga mga lugar (mangrove areas).
Dugang pa sang Presidente nga magahatag man sang pamugnan ang gobbyerno sa idalom sang Grassroots Entrepreneurship for Eco-Tourism (GREET) sang Department of Tourism para sa pagpaninlo sa mga baybayon kag coastal areas.
Nalakip man sa amo nga programa ang jatropha planting kag ang pagpananom sang lobi, LPG retrofitting sang tricycles kag mga pampubliko nga salakyan kag barangay electrification pinaagi sa paggamit sang solar panels.
Pagagamiton man ang Out-of-School Youth Serving Towards Economic Resiliency (OYSTER) sa pag designar sang mga alagyan para sa mga biseklita, pag instolar sang solar-power nga mga street lights kag iban pa nga mga inisyatibo para sa programa sa idalom sang Renewable Energy Act.
Suno pa kay Pangulong Arroyo nga kapin sa 6,000 ka mga short term nga mga trabaho ang ginbuksan na bilang kabahin sang P650 ka milyon nga poverty mapping project sang Department of Social Welfar and Development. (PIA) [top]
