Hiligaynon News: Energy Sec. Reyes nagpasalig nga magabalik sa normal ang supply sang LPG
by A. Lumaque
Roxas City (12 February) -- Ginpahayag ni Secretary Angelo Reyes sang Department of Energy ukon DOE nga magabalik na sa normal ang supply sang liquefied petroleum gas ukon LPG sa mas madali nga panahon.
Ang panibag-o nga pahayag ni Sec. Reyes ang iya ginpaabot sa pulong-balitaan sa Malakanyang kahapon kasunod sa pahayag man sang mga importer sang LPG nga may bastante na sila nga supply sang LPG sa karon.
Gindugang pa ni Reyes nga nagapakig-angut na sa karon ang DOE sa Department of Justice ukon DOJ, Department of Trade and Industry ukon DTI kag National Bureau of Investigation ukon NBI agud nga mapabaskog pa gid ang kampanya sang gobyerno batuk sa illegal nga mga retailer sang LPG.
Samtang ginpasalig man sang DTI nga maid-id pa gid sini nga pagabantayan ang presyo sang LPG sa mga outlet agud nga mapangapinan ang interes sang mga bumalakal.
Nahibaluan nga sa karon may hagna nga ginaduso sa Kongreso nga nagahatag sang dugang nga poder sa DOE agud mapanindugan sang ahensya ang ila katungdanan sa paglagas sa mga sindikato nga ara sa likod sang hoarding kag smuggling sang LPG. (PIA) [top]
