Hiligaynon News: Pangulong Arroyo maga-inspeksyunon sang mga botika nga malapit sa Palasyo
by A. Lumaque
Roxas City (12 February) -- Magapatigayon si Pangulong Gloria Macapagal–Arroyo sang pag-inspection sa mga botika nga malapit sa Palasyo nga nagabaligya sang generic drugs agud personal nga mahibaluan ang estado sang pagpaninguha sang gobyerno para sa kalidad apang barato nga bulong para sa mga Pilipino.
Natalana nga paga-bisitahan sang Presidente ang Generics Pharmacy sa may Nagtahan cor. J.P. Laurel Street sa Manila agud nga usisa-on ang mga kagamitan, mga supply subongman presyo sang bulong nga ginabaligya kag agud nga makapakig-istorya sa mga bumalakal ukon benepisyaryo sang nasambit nga botika.
Si Pangulong Arroyo ang pagaupdan sa iya pagpatigayon sang inspection sa botika sang mga opisyal sang natungdan nga mga ahensya sang gobyerno kapareho sang Department of Health ukon DOH kag Philippine International Trading Corporation ukon PITC.
Matandaan nga ginpirmahan ni Pangulong Arroyo ang Universally Accessible Cheaper and Quality Medicines Act of 2008 sang Hunyo 2008 bilang isa sa mga mayor nga tikang sang administrasyon nga mapanubo' ang presyo sang bulong sa pungsod. (PIA) [top]
