Hiligaynon News: Nominasyon para sa 2009 Outstanding Public Officials and Employees bukas na
by A. Lumaque
Roxas City (16 February) -- Nagabaton na ang nagkalainlain nga mga talatapan sang Civil Service Commission ukon CSC sang mga nominasyon para sa 2009 Outstanding Public Officials and Employees.
Ini ang ginpahibalo sang CSC sa pagsugod sang tuigan nga programa nga nagahatag pagpasidungog sa mga talalupangdon nga mga indibidwal kag mga grupo sa gobyerno pinaagi sa Presidential Lingkod Bayan, Dangal ng Bayan kag Pag-asa Awards.
Samtang ang programa ang kaangut sa ginaduso sang CSC nga pagpalapnag sang maayo nga kultura sa serbisyo publiko subongman pagtalupangod sa maayo nga hinimuan sang mga nagapangalagad sa gobyerno.
Kaangut sini, ginaagda ang pagpasakop para sa 2009 Outstanding Public Officials and Employees pinaagi sa pag-sumite sang mga nominasyon tubtob Marso 31 karon nga tuig.
Ang dugang nga detalye para sa mga interesado kaangut sa programa ang sarang makuha sa mga talatapan sang CSC ukon sa website sang Komisyon nga www.csc.gov.ph. (PIA) [top]
