Hiligaynon News: 10,253 ka pamilya nakaagum benepisyo halin sa gobyerno
by PS Mabaquiao
San Jose, Antique (16 February) -- May kabilogan nga 10,253 ka pamilya ang naka agum sang mga benepisyo halin sa program sang gobyerno nga "Pantawid ng Pamilyang Pilipino" ukon 4Ps nga gina implementar sa lima ka banwa sang probinsya.
Suno kay Lazaro Petinglay, Provincial Social Welfare and Development Officer and 4Ps sangka stratehiya sang gobyerno para mapakigbatuan ang kaimulon paagi sa paghatag sang sustento sa imol nga panimalay agud mapaayo ang ilang ikaayong lawas kag nutrisyon, edukasyon ilabi nagid sang mga kabataan nga naga edad 0-14 ka tuig.
Sa nahauna nga tatlo ka bulan sang tuig 2009, si Petinglay nagsugid nga may kabilogan nga P25,625,000 nga balor sang pondo ang ginpanagtag sang gobyerno paagi sa Land Bank of the Philippines. Ang masunod nga mga paghatag sang sustento sa nabilin nga binulan sang tuig ipaagi na sa mga ATM account sang mga benepisyaryo sa amo gihapon nga bangko.
Ang banwa sang San Remigio nakakuha sang pinakadaku nga alokasyon ss kantidad nga P7,548,800 para sa 2,985 nga pamilya; ang banwa kang Bugasong may P5,489,100 para sa 2,180 ka pamilya; ang Laua-an may P4,244,000 para sa 1,947; ang Valderrama may P4,107,400 para sa 1,666 ka pamilya kag ang Barbaza may P3,600,500 para sa 1,475 ka pamilya.
Sang nagligad nga tuig, may kabilogan nga 337,416 nga mga panimalay sa pungsod Pilipinas ang naka-agum sang benepisyo sang 4Ps kag kadya nga tuig may kabilogan nga 320,000 ka mga panimalay.
Si Petinglay nag dugang pa gid nga ang 4Ps sangka programa kang gobyerno nga magahatag lamang sang sustento pinansyal sa mga benepisyaryo kun matuman ang mga masunod nga kondisyones.
- Ang mga nagabusong nga nanay dapat magpa pre-natal kag post-natal check up kag magbata sa presensya sang doctor, nurses ukon midwife;
- Ang mga ginikanan ukon mga nagabantay sang bata dapat magatambong sang "parenthood sessions/parent effectiveness service";
- Ang mga kabataan nga naga-edad 0-5 ka tuig dapat maka- agum sang "preventive health check up" kag libre nga bakuna;
- Ang mga kabataan nga naga-edad 3-5 ka tuig dapat maga eskwela sa day care ukon mga pre-school kag;
- Ang mga kabataan nga naga-edad 6-14 ka tuig dapat maga eskwela sa elementarya ukon high school kag maga inom sang "deworming pills" sa kada lima ka bulan.
Si Petinglay naga hinyo gid sa mga benepisyaryo sa pagtuman sang mga kondisyones sang amo nga programa para tayuyon nga mabaton ang sustento kag mahatag ang mga kinahanglanon sang kabataan agud magin mayad ang ilang palaabuton kag sang bilog nga pamilya. (PIA) [top]
