Tagbilaran City (16 October) -- Tungod sa nagkalig-on ug nag-kasaka nga ekonomiya sa atung nasud, gi-ubanan usab sa nagkahi-usa ug kadasig sa mga lokal nga pamunu-an, ang lalawigan sa Bohol makatagam-tam ug bentaha kompara sa ubang lalalwigan sa nasud. Mao kini ang gibutyag ni Secretary of Finance Margarito Teves sa iyang pagbisita sa lalawigan sa Bohol miadtong Domingo.

Si Sec. Teves, nga adunay kagikan sa Dipatlong, Maribojoc; mao ang pinasidunggang dinapit sa ika 146 nga anibersaryo sa pagmugna sa maong lungsod.

Matud pa sa kalihim, dako kaayo ug bentaha ang Bohol sa ubang lalawigan sa nasud tungod kay ang mga nangulo niini, ga-kupot usab ug dagkong katungdanan sa kagamhanan. Iyang gi-ehemplo sa Gob. Erico Aumentado nga kasamtangan mao ang presidente sa liga sa mga provinsiya ug ULAP ug si Bise Gob. Julius Herrera nga mao usab ang presidente sa vice-governor’s league.

Gipasabut ni Teves, nga tungod sa paglig-un sa atong ekonomiya, ug ang pagpahimutang sa programang ekonomikanhon sa gahamhanan, dako ug kahiguyunan nga mapunduhan ang mga nagkalain-laing proyekto ug infrastraktura sa kanasuran. Unya tungod sa kalig-on sa pamunu-an sa Bohol, dako usab kini ug kasiguru-an nga matuman ang mga programa ug pag-asenso sa lalawigan.

Sa laing bahin usab, tungod kay nag-una ang Bohol sa turismo, ug ang turismo gi-isip nga dako ug matabang sa ekonomiya sa nasud, adunay bentaha gihapon ang Bohol tungod kay si Congressman Edgar Chatto sa unang distrito, mao man usab ang ‘committee chairman’ sa turismo sa Kamara, dugang ni Teves.