Cebuano News: Gov. Garcia may planong mohatag og award sa namatay nga GMA 7 reporter
by Roberto M. Cabardo
Cebu City (16 October) -- Si Gob. Gwendolyn Garcia nipasalig pagtan-aw sa posibilidad nga mahatagan og award sa Cebu Provincial Government ang namatay nga reporter sa GMA 7 Manila nga si Danifel “Dan” Campilan.
Mahinumduman nga sa wala pa siya namatay sa dihang nabangga ang awto nga iyang gimaneho, si Campilan sa iyang pagkareporter mapasegarbohon kaayo nga moanunsiyo sa mga televiewers sa iyang pagka-Sugbuanon.
Usa ka kinaiya og pagbati nga nagpakita sa pagmahal sa reporter sa iyang lugar nga gigikanan.
Sa pamahayag sa gobernadora, siya niingon nga ang plano paghatag pasidungog kang Campilan iyang i-presentar karong semanaha sa mga miyembro sa provincial board.
Si Garcia nipagawas ning maong pamahayag atol sa iyang pagbisita sa Danao City kauban si Pres. Gloria Macapagal-Arroyo niadtong Biyernes. Ang presidente maoy pinasidunggang dinapit sa pagbukas sa terminal og merkado publiko sa siyudad sa Danao. (PIA Cebu) [top]
