Cebuano News: Polis gikan sa Region 9 midawat na og sweldo
by Roberto M. Cabardo
Cebu City (16 October) -- Ang mga bag-ong na-recruit nga mga polis gikan sa Zamboanga og uban pang dapit sa Region 9 nga ani-a karon sa Sugbo ang nakadawat na sab sa ilang sweldo niadtong Huwebes.
Sa interbyu ning tigbalita, si P/SSupt. Carmelo Valmoria, hepe sa Operations and Plans sa PRO 7 nagkanayon, “Nadawat na nila ang ilang sweldo niadtong Huwebes (Oktubre 12) sa niaging semana. Ang wala pa nila madawat mao na lang ang suhulan sa tibuok bulan sa Septembre,” matud niya.
Ang matag polis nakadawat og P6 mil ka pesos nga suhulan gikan sa Oktubre 1-15 ning tuiga. Nibutyag usab siya nga nakadawat na sab ang mga polis gikan sa PRO 9 sa ilang sweldo sa bulan sa Hulyo og Agosto og nga ang kulang mao na lamang ang suhulan alang sa niaging bulan.
Sa pagkakaron, adunay 100 ka mga polis ang nadestino sa Sugbo isip dugang pwersa nga maghatag seguridad sa mga delegado sa ASEAN Summit nga ipahigayon dinhi sa Sugbo karong Disyembre 11-14 ning tuiga.
Sayo niini, ang mga opisyal sa kapolisan sa Region 9 nipasalig nga makadawat na gayud sila sa ilang sweldo karong bulana. Nidugang usab sila pag-ingon nga ang pagkadugay sa sweldo sa ilang mga bag-ong sakop tungod usab sa dugay nga panahon nga pag-process sa mga papeles sa nahisgutang mga police recruits.
Dugang niini, gibutyag ni Valmoria nga importante gayud ang pagpasar sa budget alang sa dugang nga police recruits nga mohatag sa seguridad sa publiko. (PIA 7) [top]
