Cebuano News: NEDA 7 official milaum nga ipasar sa Senado ang 2007 budget
by Roberto M. Cabardo
Cebu City (17 October) -- Usa ka opisyal sa National Economic Development Authority (NEDA) VII naglaum gihapon nga ipasar sa senado ang 2007 budget human gipasar sa kongreso ang budget alang sa sunod tuig.
Niingon hinuon si Rafael Tagalog, hepe sa Social Development Sector sa NEDA, nga wa pa hinuoy kaseguruan nga maaprubahan dayon kini sa senado kay debatehan pa man kini sa mga senador.
"Sa pagkakaron, di pa kaayo ta maglipay kay wa pa man guy seguro nga maaprubahan ang budget alang sa sunod tuig sa senado," nagkanayon si Tagalog.
Kung mahinumduman, sa kadaghang higayon ang budget sa kagamhanan sige lang re-enacted kon parehas gihapon sa budget nga naaprubahan sa niaging tuig.
Sa iyang pagbisita sa Danao City sa niaging semana, si Pres. Gloria Macapagal-Arroyo nipabati sa iyang kalipay sa pagpasar sa 2007 budget sa mga kongresista. (PIA Cebu) [top]
