by Rey Anthony Chiu

Tagbilaran City (18 October) -- Samtang gipa-abot sa Malakanyang ang taho nga may umaabot nga pagtaas sa credit ratings niini, ang Bol-anon og kaliwat nga Kalihim sa Finance mibutyag nga kini nagdala og maayong balita sa kinatibuk-ang nasud.

Una nga nga gikataho nga si Presidente Gloria Macapagal Arroyo gisayran kabahin sa mahimong mas taas nga rating sa Moody's Investors Service, ug niini, iyang gihangyo ang Senado nga ipalusot na ang gisugyot nga budget sa 2007 aron mahulma na ang pang-goberno nga agenda sa kaugmaran.

Ang international credit ratings companies maoy magdiktar kon pila na ang gibug-aton sa ekonomiya sa nasud ug magtumbok sa iyang katakus sa pagbayad sa gi-utang niini.

Atol sa ika 146 nga kasumaran sa pagkalungsod sa Maribojoc niadtong Domingo, Oktubre 15, si Kalihim sa Finance Margarito Bustaliño Teves mipasabot ga ang pagtaas sa credit rating sa nasud magtugyan sa binilyon ka pesos nga matigum.

Gipasabot ni Teves nga sama sa banay nga may kita nga P50 matag tuig, ug may galastohang P100mil, kinahanglan pa gihapon nga mamaylo ang nasud. Niini, ang mapataas nga credit rating magpakunhod sa interes sa mga utang sa gawas, butang mga magtunol sa matigum alang sa panudlanan sa nasud nga ibayad unta sa taas nga interes.

Dugang ni Teves, sa matag pagtaas sa credit upgrade, mokabat sa P5B ang matigum sa nasud, pundo nga adto usab mobanlas sa proyektong imprastraktura ug serbisyong sosyal.

Matud usab ni Teves, mituo si Presidente Arroyo nga ang budget sa administrasyon dili lamang maghulma sa development agenda, kon dili usab magtimaan sa usab sa "payback" ngadto sa katawhan human sa mga “reporma” nga gipatuman.

Niini nga taho sa pagtaas sa ratings, gipaabot usab nga ang international ratings sa Pilipinas ipataas gikan sa "negative" ngadto sa "stable" sa hinapos ning tuig.