Cebuano News: Opisyal sa PRO 7 gilauman ang pagpasar sa 2007 budget
by Roberto M. Cabardo
Cebu City (19 October) -- Gilauman sa opisyal sa kapolisan sa Central Visayas ang pagpasar sa 2007 budget sa Senado.
Kini maoy giluwatan nga pamahayag ni P/SSupt. Carmelo Valmoria, hepe sa Operations and Plans Division sa PRO 7 sa dihang nahinabi ning tigbalita.
Matud ni Valmoria, ang pagpasar sa budget dako og ikatabang sa pagkuha og dugang mga bag-ong police recruits og mga ekipo alang sa mga buhatan sa kapolisan sa nasod.
Dugang pa niya, angay lamang nga tan-awon sab sa Senado ang dakong panginahanglan sa salapi sa kagamhanan sama sa kapolisan sa pagtuman sa ilang trabaho ilabi na nga ang PNP giapil na man sa kampanya alng sa counter-insurgency.
Sa pagkakaron, ang kapolisan sa Sugbo temporaryo pa lang nga nadungagan og pwersa gikan sa lain-laing mga rehiyon sa nasod agi og pagpangandam sa seguridad sa mga delegado sa ASEAN Summit dinhi.
Apan gipaabot nga ang problema sa kakulang sa kapolisan sa Sugbo nga ubos sa ideal ratio nga usa ka polis sa matag lima ka gatos ka tawo motumaw na sab human unya mobalik sa ilang mga units ang augmentation forces nga ani-a karon sa Sugbo alang sa summit. (PIA Cebu) [top]
