Cebuano News: 2.5-M ka Pinoy mi-apil sa Guinness record "Stand Up" kampanya sa UN batok sa kawad-on
Tagbilaran City (20 October) -- Ang kampanya sa Tinipong Bansa o United Nations batok sa kawad-on mi sulod sa talaan sa ‘Guinness World book of records’ sa pinaka-daghan nga misanong sa maong kampanya.
Mao kini ang gibutyag ni Dino Subingsubing, information coordination officer sa UN Fund for Population Activities kon UNFPA. Matod pa ni Subingsubing, mi-abot sa 23.5 milyones ang mibarog ug misa-ad nga mo-apil sa pakig-bisog batok sa kawad-on.
Sa 23.5 milyones, 2.3 milyones mga Pilipino; kon usa sa napulo nga mi-barog Pilipino. Gipamatud-an usab kini sa Sycip, Gorres, and Velayo (SGV) accounting ug auditing nga kompanya.
Ang maong kampanya apil sa UN Millenium Development Goals kon MDG nga bu-ot mosumpo sa problema sa kawad-on ug kagutom sa tuig 2015. Apil sa kampanya ang pagpalig-un sa edukasyon, pag hatag ug gahum sa kababa-inhan ug gender equality, pagkunhod sa kadaghanon sa nangamatay nga kabataan; pagpalig-on sa programa sa “maternal health” ; pakig-batok sa sakit nga HIV/AIDS, malaria ug uban pang makatakod nga sakit; malungtarong programa sa kinaiyahan; ug ang pagtinabangay sa tibuok kalibutan para sa kaayuhan.
Dinhi sa lalawigan sa Bohol, bisan tuod wala maka apil sa maong “Stand Up” nga kampanya, magusganon gihapon ang probinsyal nga pamunu-an, pinaagi sa Bohol Poverty Reduction Management Office kon BPRMO sa pagmugna ug mga programa aron masumpo ang problema sa kawadan-on dinhi sa lalawigan. (PIA/aee) [top]
