Tagbilaran City (20 October) -- Isip pagtuman sa iyang saad aron mo-asenso ang katawhan sa kanasuran, migahin si Presidente Gloria Macapagal-Arroyo ug 1.7 trilyones pesos para sa nagkalain-laing proyekto sa infrastraktura sa kagamhanan.

Ang paghatag ug facilidad dako kaayo ug tabang aron madali ang serbisyo ug asenso sa mga kanasuran, labina sa mga lagyong barangay ug lungsod.

Mao pod kini ang gisaad sa presidente sa iyang State of the Nation Address kon SONA miadtong Hulyo ning tuiga.

Ang proyekto molangkob sa paghimo ug pag-ayo sa mga tugpa-anan, dunggu-anan, ug dalan nga mosumpay sa mga ‘roll-on’ ug ‘roll-off’ Strong Republic System nautical highway. Apil na pod niini ang tulay, riles sa tren, ug mga facilidad sa gahom da gitab ug panubig.

Gi-pasabot sa presidente, nga kon matuman na ang maong mga infrastraktura, dako ug direkta na ang makuhang benepisyo sa katawhan ug makahatag pod kini ug kasiguruhan sa panarbahu-an.