By Bong Pedalino

MAASIN CITY (1 February) -- Sa tuyo nga hingpit nang matapos ang mga extra-judicial ug may sambog-political nga pagpamatay sa nasud, si Pangulong Gloria Macapagal Arroyo kusganong nanaad nga iyang tauran og ngipon ang mga sugyot sa Melo Commission aron mahimong epektibo kini ug sa ingon mahunong na ang mga nanghitabo nga mga human rights violations.

Sa usa ka pamahayag nga iyang giluwatan atol sa Vin D’ Honor didto sa Malacanang Heroes Hall karong buntag, ang Presidente mihatag og igo nga pagduot sa panginahanglan alang sa mas halapad ug mas lawom pa nga pagsabot diin nalambigit usab niini ang pag-paluyo sa mga hingtungdang sector o pundok.

Daghan pa gyod ang angay pamalandungan ug mga buhatonon, apan dili gyod undangon ang panlimbasog aron matunhay ang tawhanong katungod, nagkanayon si Presidente Arroyo atubangan sa mga sakop sa diplomatic community pinangulohan sa Diplomatic Corps Dean nga si Papal Nuncio Fernando Feloni.

Gidugang pa sa Pangulo nga ang kagamhanan makig-ambahan niining maong gimbuhaton uban sa Simbahan, pundok sa mga Aktibista, mga tigbalita, opisyales sa gobyerno ug bisan ang ubang kanasuran ingon man ni Justice Melo aron mapalig-on ang mga desisyon sa Commission ug mahatagan kinig kusog, makapaak sama sa ngipon.

Subay niini, nanawagan si Pangulong Arroyo sa mga paryente, mga saksi, ug mga militanti nga mga pundok sa pagsulti, pagpadayag sa ilang nahibaw-an, ug pag-plastada sa mga pruyba, mga ebidensiya aron makaplagan ug ma-angkon ang gimanggad nga hustisya ug ka-angayan.

Kagahapon nadawat sa Malacanang ang usa ka kopya sa Melo Commission report ug gipalihok dayon sa Presidente ang mga hingtungdang ahensiya sa gobyerno, lakip na ang Armadong Kusog sa Nasud, aron mohimo kinig mga lakang basi sa rekomendasyon sa maong Komisyon.

Kahinumdoman nga ang Melo Commission gitukod sa Presidente niadtong Agosto, 2006, aron maoy mohimog lawom nga imbestigasyon labot sa sunod-sunod nga pagpamatay sa mga aktibista ug mga tigbalita.