MAASIN CITY (2 February) -- Sa natad sa pang-gubatan diin ang atong nasud nakig-alayon tali sa Estados Unidos aron panlimbasogan ang terorismo, kini walay gi-ila ug gipili basta mahitungod na sa terorista, o mga tawong nagsabwag og kagubot.

Kini ang giluwatang pamahayag ni Press Secretary Ignacio Bunye kagahapon.

Gitataw ni Bunye nga duna karoy lakang nga gihimo ang gobyerno aron gukdon ang usa ka nailhan na nga tig-pamomba didto sa Mindanao.

Siya malaumon nga ang maong pag-gukod sa nasangpit nga terorista mag-malamposon, ug mo-resulta sa paghatag kalinaw sa huna-huna alang sa katawhan sa Mindanao ug makahatag usab maayong panglantaw alang sa sabot-sabot sa kalinaw.

Gidugang pa ni Bunye nga siya masaligon nga ang Moro Islamic Liberation Front (MILF) mopadayon sa pagpa-luyo sa mga kalihokan kontra-terorismo isip tipik ug kabahin sa ilang gisaad nga kalinaw ug pagtuman sa balaod.