Cebuano News: Presidente Arroyo miawhag sa SC pagtukod og korte aron mohusay sa extra-judicial killings
Maasin City (2 February) -- Si Presidente Gloria Macapagal Arroyo nangayo sa Korte Suprema nga maghimo kini og usa ka piniling grupo diha sa Korte nga maoy tugahan alang sa paspas nga paghusay sa tanang kaso sa di-makatarunganon ug katingad-an nga mga pagpatay sa lain-laing dapit sa nasud.
Nunot niini, si Executive Secretary Eduardo Ermita miingon nga pinaagi sa talagsaong papel nga paga-kuptan unya sa labing taas nga Hukmanan, ang Pangulo naglaum nga ang mga hingtungdang pamilya ug mga paryente sa mga biktima mopakita ug motestigos batok sa mga gitumbok nga mga suspetsadong criminal.
Kahinumdoman nga ang kakulang sa pag-paluyo sa mga partidos sa biktima maoy nakababag sa tiunay nga pagkab-ot sa hustisya sa mga ning-taliwan na nga mga minahal sa kinabuhi.
Sa nasayran, si Chief Justice Reynato Puno mipadayag og pag-uyon sa tinguha sa Presidente nga mag-umol siya og nilain nga hut-ong sa mga Maghuhukom nga motutok lamang gayod sa mga kaso sa gi-ingon nga mga extra-judicial killings nga nanghitabo. (PIA Southern Leyte) [top]
