Ni Bong Pedalino

MAASIN CITY (14 February) -- Kinahanglanon na gyod nga mahimong hingpit na nga usa ka balaod ang balaodnon batok sa terorismo.

Kini ang kusganong gipanawagan karon sa Palasyo sa Malacanang, nunot sa paghulagway niini sa maong lakang isip paagi pag-patunhay sa nasudnong kalinaw, pag-patubo sa ekonomiya, ug pag-hatag kompyansa o pagsalig sa ubang kanasuran dinhi kanato sa Pilipinas.

Si Press Secretary ug Presidential Spokesman Ignacio Bunye mitumbok sa usa ka pamahayag nga ang pagpadali nga mapasa na ang anti-terror bill hatagan unta og bili sa mga magbabalaod ug dili kay isalikway na hinuon.

Matud ni Bunye nga gamay na lang gyod kaayo'g kulang nga mahimo nang balaod ang anti-terror bill ug dili kini makahasaol kanila pag-undang una makadiyot sa ilang pag-pangampanya aron mo-aginod na sa unahan ang para sa nasudnong interes.

Ang panawagan ni Bunye nagkatakdo sa awhag ni Pangulong Arroyo pagpatawag sa Congreso alang sa duha ka adlaw nga special session karong Pebrero 19 aron mahuman ang mga na-pending nga mga balaodnon, sama sa anti-terrorism ug tourism bills.

Samtang, sa laing bahin, pormal nang gipahibalo ang kompletong 12 ka senatorial ticket sa administrasyong Arroyo ubos sa Unity Team.

Kini gilangkoban dili lamang sa mga seguradong dumadaug nga mga kandidato kondi nagpadayag usab sa kahiusahan sanglit tanang rehiyon sa nasud gi-representahan.

Ang mga kandidato sa Unity Team naglakip ning mosunod: Sen. Edgardo Angara, Sen. Joker Arroyo, Sen. Ralph Recto, Tessie Oreta, Vicente Sotto III.