Manila (21 February) -- Nagpadayag og mainiton nga pag-pasalamat si Pangulong Gloria Macapagal Arroyo ngadto sa mga Congresista gumikan sa ilang pag-uyon nga mapalabang ang anti-terror bill ug uban pang mga balaodnon alang sa nasudnon nga mga intereses.

Apan sa samang higayon gidasig sa babayeng Pangulo ang mga magbabalaud sa pag-pahimulos sa panahan samtang kini init pa aron hingpit nang mahimong balaod ang anti-terror bill.

“Akong gi-awhag ang duha ka bay-balauranan sa Kongreso sa pagdikumot sa ilang panahon samtang nagbaga-baga pa sa kainit sila sa ilang gimbuhaton, aron sa ingon mahatagan na gyod natog saktong ngipon ang pagpakig-away batok sa terorismo, ug ato nang mapugngan ang pag-agas sa ilang pundong salapi, mga material, ug mga tawo mismo nga buot magtisok og kagubot,” ni Presidente Arroyo pa sa iyang pamahayag.

Matud ni Presidente Arroyo nga nasubo siya sa hinanaling kamatayon ni Cong. Antonio Serapio sa Valenzuela kinsa nagpaingon na unta sa Kongreso aron pag-tambong sa gipatawag niya nga tinuyo nga sesyon apan nadisgrasya hinuon.

“Ang akong mga pahasubo sa iyang mga mahal sa kinabuhi ug sa mga katawhan nga gi-alagaran sa iyang distrito. Atong ipahinungod kaniya kining way hunong natong mga paningkamot alang sa kalinaw ug ka-sigurohan sa tanang mga Pilipino sa bisan asa man sila nga dapit,” nagkanayon si Pangulong Arroyo.