Cebuano News: Piniliay sa Mayo naa lang sa “tig-gama” o “tig-guba” ang paga-pili-an - PGMA
Southern Leyte (22 February) -- Ang eleksyon karong bulan sa Mayo mag-sentro sa ekonomiya ug busa ang mga botante mag-pili lang sa duha ka klase sa mga kandidato, kadto bang mga “tipanday sa nasud” o kadto bang pursegido “mobungkag sa mga gambalay sa nasud.”
“Karong eleksyona, una sa tanan, usa ka eleksyon mahitungod sa ekonomiya. Ang mga tawo igo lang sa pagpili tali kanila nga dunay plano pag-mugna og mga trabaho ug kadtong walay plano; kadtong makalahutay pag-sustenir sa atong ekonomikanhong pagtubo, o kadtong buot mopugong sa maong pagtubo,” si Pangulong Gloria Macapagal Arroyo miingon sa iyang pakig-pulong kagahapon atol sa anibersaryo sa Technology and Livelihood Resource Center (TLRC) didto sa Mega Trade Hall sa SM Megamall sa Mandaluyong City.
Sa pagsugod pa lang sa nasudnong pag-pangampanya alang sa mga kandidato pagka Senador, ang babayeng Pangulo nanganti nga padayon niyang tutokan ang mga programa sa gobyerno alang sa pagpa-usbaw sa ekonomiya ug pagtabang sa mga kabus, hinungdan nga ang mga proclamation rallies lamang sa Team Unity sa Cebu ug Pampanga ang iyang gitambongan.
Ang “Team” nagkahulugan sa Together Everyone Achieves More, o sa binisaya pa, “sa kahiusahan mas daghan ang makab-ot.”
Sa pagpanglabay sa mga adlaw sa pag-pangampanya mas molutaw pa unya ug mas ma-klaro pa ang kalainan sa duha ka klase sa mga kandidato, sanglit ang mga tawo mahibawo man mopili alang sa ekonomiya, dili pamolitika, alang sa kaugmaon, dili ang nangagi, ug alang sa pag-hiusa, dili ang pagbahin-bahin, matud pa ni Presidente Arroyo. (PIA-Southern Leyte) [top]
