Cebuano News: Lakang kontra sa illegal nga recruitment gihingusgan
By Rodrigo S. Victoria
Tacloban City (26 February) -- Mga paningkamot nga naglakip sa mga lokal nga mga pangagamhanan batok sa illegal nga recruitment mao ang gihingusgan karong tuiga diin kini nga kampanya gipangunahan sa Philippine Overseas Employment Admiinistration (POEA) matud pa ni Department of Labor and Employment (DOLE) Secretary Artuto D. Brion kagahapong adlawa.
Si Secretary Brion mitudlo sa Administrartive Order No. 543-A nga gipagawas ning bag-o ni Presidente Gloria Macapagal Arroyo (PGMA) nga naglatid pagbalik sa anti-illegal nga mga trabahuon sa POEA pinasubay sa RA 8042 o ang Migrant Workers and Overseas Filipino Act of 1995.
Ang maong kamanduan nag-usab ug naghulip sa milabay nga Executive Order (EO) nga mauy nag-umol sa usa ka task force batok sa illegal recruitment ubos sa pagdumala sa Commission of Filipino Overseas (CFO), matud pa ni Sec. Brion.
Siya miklaro nga ang CFO mao ang gitukahan sa task force batok sa human trafficking (TFHT) pinasubay sa EO 548-A.
Ang EO 548-A matud pa ni Sec. Brion naglatid sa klaro nga termino sa mga trabaho sa POEA ug CFO sa away batok sa illegal recruitment ug human trafficking.
"Kini naghatag sa POEA pinaagi sa koordinasyon sa opisina sa DOLE sa mga rehiyon aron sa pagseguro sa dako-dako nga pagtutuk sa pakigbisog sa away batok sa mga illegal nga mga recruiters didto sa lokal nga lebel", matud pa ni Se. Brion.
Nagkanayon si Sec. Brion nga ang maong EO naglatid sa padayon nga kampanya sa POEA lakip ang mga lokal nga mga pangagamhanan sa pakigbisog batok sa away sa illegal recruiters.
Siya midugang nga ang ahensya nagsugod na sa pag-umol ug mga kasabutasn tale sa mga LGUs sa Metro Manila sa hinapos nga bahin sa miaging tuig partikular ang mga pangagamhanang syudad sa Taguig, Valenzuela, Malabon, Mandaluyong, Las Piņas, Muntinlupa ug ang syudad sa Quezon.
Ang maong kasabutan, siya nagkanayon, nagtawag sa aktibo nga partisipasyon sa hingtungdan nga mga otoridad sa mga pangagamhanang lokal sa pagpaniid ug pag-imbestigar sa mga establisamento ug mga buhatan nga gisuspetsahan nga nahilambigit sa illegal recruitment sa ilang tagsa-tagsa ka hurisdiksyon.
Ang hepe sa DOLE nagkanayon nga ang POEA naglaan sa pagmugna ug susamang kasabutan sa uban pa nga mga lokal nga pangamhanan sa Metro Manila ug uban pa nga mga rehiyon karong tuiga pinasubay sa Executive Order No. 548-A ug RA 8042. (PIA-Biliran) [top]
