by Flor Jackson

Naval, Biliran (27 February) -- Aron pagwagtang sa katahap nga adunay sobra nga mga balota nga gi-imprenta alang sa piniliay sa Mayo 14, ang Commision on Elections o kon Comelec niadtong usa ka adlaw nangimbitar ug mga political parties aron mag-obserbar ug mag bantay sa pag-imprenta sa mga balota ug pag deliver niini ngadto sa lugar diin kini naha destino.

Sa susamang higayon, si Comelec Chairman Benjamin Abalos, Sr nag mando usab sa mga local election officers pagtudlo sa mga lugar diin kini mamahimong common poster areas aron mahiplastar ang political advertisements sa tanang mga national ug local candidates.

Si Chairman Abalos ning-ila ug nagpahayag nga ang pagsalig sa mga tawo sa Comelec naibanan o nahilis tungod sa gitahapan nga pag imprenta ug extra nga balota bisan pa man sa ilang hugot nga pagpasalig nga ang National Printing Office dili aghaton nga mag imprenta ug dugang o extra nga mga balota.

Si Chairman Abalos nag dugang pa pag-ingon nga ang mga balota ipailawom ug usa ka pag audit lakip na niini ang mga trimmings ug siya hugot nga nag-ingon nga walay pribado nga mga kompaniya nga kontratahon sa pag-imprenta sa balota.

Sa dihang gipangutan-an si Chairman Abalos kung pila ka mga balota ang imprentahon, siya nagkanayon nga mokabat sa 50 milyones basi sa sayo nga projection nga ang final nga listhan sa mga botantes mokabat sa 45 ngadto sa 50 milyones.

Si Abalos nagkanayon nga ang final nga listahan sa mga botantes mahimo nang makuha pinaagi sa usa ka CD karong ika-tulo o ika-upat nga semana sa Marso ug bisan kinsa mahimong makapangayo ug kopya niini.

Samtang sa Chairman Abalos pinaagi sa usa ka memorandum naghatag sa mga election officers ug 10 ka adlaw aron mahimo ang dugang nga mga common poster areas. Ang maong mando nahimo human lamang madawat sa Comelec ang reklamo nga dili paigo ang mga poster areas alang sa nagkadaiyang political advertisements sa mga national ug local candidates.