By Rodrigo S. Victoria

Tacloban City (27 February) -- Si Presidente Gloria Macapagal Arroyo mipakita kagahapong adlawa sa dako nga gikatabang sa sektor sa impormasyon ug komunikasyon nga teknolohiya ilabi na ang mga miapil sa business process outsourcing (BPO) nga nakatabang sa pagmugna sa mokabat sa 6 ngadto sa 10 milyones nga trabaho sakob sa iyang administrasyon hangtod sa 2010.

Sa inagurasyon kagahapong adlawa sa buntag sa una nga Sykes Enterprises, Inc. Center sa probinsya sa Cebu, si Presidente Arroyo nagpasalamat kang Chuck Sykes, presidente ug chief operating officer sa kompaniya nga nag-operate tibuok kalibutan, para sa mga oportunidad sa direkta nga mga trabaho ug sa mga indirekta nga pangempleyo nga namugna pinaagi sa pagtukod sa unom ka Sykes center sa Pilipinas.

“Unta aduna pay dugang nga mga Sykes centers dinhe sa Pilipinas,salamat sa 10,000 ka mga trabaho nga imong gihatag ngadto sa mga Pilipinhon ug sa mga trabaho nga imong namugna ngadto sa mga negosyo palibot sa BPO center,” nagkanayon ang Presidente.

“Bisan pa ug wala silay English nga call center, nakakuha sila ug mga trabaho tungod sa inyo,’ ingon sa Presidente ngadto sa Sykes, mahitungod kini sa libuan nga indirekta nga mga trabaho nga namugna palibot sa BPO centers sama niadtong mga nakabenepisyo nga mga janitors, waiters, jeepney drivers ug uban pa.

Ang ICT nga sektor ilabi na ang call centers ug BPO nga gitukod sa nagkalin-laing parte sa nasud nakatabang ug dako sa pagtubo sa ekonomiya diin ang sektor sa serbisyo ang nanguna sa lista.

Si Sykes’ senior president ug managing director sa Asia-Pacific nga si Rim Mike Henderson nagkanayon nga ang malambuon nga ekonomiya sa Pilipinas ang nakaaghat sa Sykes sa pagpahalapad sa ilang negosyo sa nasud.

“Kami magpadayon sa pagpangita ug paagi nga makamugna ug mga trabaho ug makatabang ngadto sa lokal nga ekonomiya,” nagkanayon si Henderson diin siya midugang pagsulti nga tungod sa suporta sa gobyerno, magpadayon sila sa “dugang pagpahalapad sa ilang negosyo”.

Si PGMA mauy nanguna sa ribbon-cutting ug ang pagbukas sa marker sa main entrance sa Sykes-Cebu nga nahamutang sa F. Cabahug Street sa Cebu City.

Ang Presidente mihimo ug dali nga paglibot sa call center operations area ug nakighimamat sa uban nga mga Cebuano nga mga trabahante sa Sykes.

Ang Sykes usa ka nag-unang establisamento sa tibuok kalibutan nga naghatag ug outsourced customer contact management solutions ug services sa natad sa BPO diin kini may 17,000 ka mga trabahante sa 16 ka mga nasud.

Ang Sykes nga atua magbase sa Tampa, Florida aduna nay unom ka BPO centers sa Pilipinas diin ang lima niini atua sa Metro Manila.

Sa center niini sa Cebu lang, ang Sykes adunay 1,700 ka empleyado diin kini miplano pa sa pagdugang niini ngadto sa 2,700.

Ang inagurasyon sa Sykes-Cebu nahadungan sa ika-10 nga anibersaryo sa Sykes dinhe sa nasud.