Cebuano News: Gobyerno, MILF nagtambayayong pagpugong nga mograbe pa ang kapintas sa Mindanao, matod pa ni Bunye
By Lanie Pitao-Tupaz
Manila (12 March) -- Ang National Government (NG), Moro Islamic Liberation Front (MILF) ug uban pang mga grupo nga adunay katuyoan sa padayong kalinaw sa Mindanao nagbuhat sa tanan nilang mahimo pagprebentar sa pag-grabe sa kapintas sa rehiyon, matod pa ni Prsse Secretary ug Prsidential Spokesperson Ignacio R. Bunye.
Si Bunye mipahayag diha sa iyang sinulat “View From the Palace” nga ang gobyerno ug ang MILF ceasefire committees uban sa panabang sa International Monitoring Team (IMT) nga gipangulohan sa Malayasia, aktibong nagbuhat sa ilang obligasyon pagpakubos sa kapintas sa Mindanao ug ang Palasyo misalig nga ang tanan partido adunay kakayahan ug determinasyon pagpasunod sa proseso.
Sa miagi si Bunye mipadayag sa kahadlok nga ang upat ka tuig nga sabot sa kalinaw sa gobyerno ug MILF nagkaproblema sa dihang nagka-engkuwentro ang military ug mga sundalo sa MILF didto sa Midsayap sa North Cotabato niadtong Biyernes diin namatay ang usa ka 60-anyos nga babaye ug ang pagkasamad sa iyang 15-anyos nga apo.
Ang gobyerno ug ang MILF nagkahiusa sa pagsolbad sa pinakaulahing kagubot sa usa ka kalma, sinsero ug patas nga pamaagi samtang nagpadayon ang peace talks, matod pa ni Bunye.
Si Bunye mipasalamat sa tanan kauban sa gobyerno ingon man usab sa mga kaanib sa international community sa ilang aktibong partisipasyon pagmintenar sa kalinaw sa Mindanao.
Labaw sa tanan, si Presidente Gloria Macapagal-Arroyo gustong ipatigbabaw ang kalinaw sa mga komunidad ug mawala ang kalisang. Si Presidente misalig nga ang tanan partido komitido sa samang tinguha, dugang pa ni Bunye. (PIA Biliran) [top]
