Southern Leyte (20 March) -- Si Presidente Gloria Macapagal Arroyo determinado gayod nga mopalambo ug mopalig-on sa ekonomiya sa nasud ug mo-mugna pa gayod siya og daghan nga mga trabaho alang sa mga Pilipino aron mahaw-as sila sa tumang kalisod.

Gibuhian sa Pangulo ang maong pamahayag human niya madawat ang tahu sa National Statistics Office (NSO) diin gipakita sa Labor Force Survey niini nga misaka ngadto sa 92.2% ang mga tawong naka-trabaho, gikan sa 91.9% sa nag-unang tuig.

Sa nalambigit nga kalambuan, ang NSO miingon nga ang gidaghanon sa mga Plipinong naka-trabaho miabot og 33.5 milyon ka buok sa bulan sa Enero karong tuiga, ug mas taas kini sa 32 ka milyon nga nahitala sa miaging tuig.

Ang "employment generation" o mga kalihokan nga sarang ka-kuhaan og pang-empleyo, mitaas sa bulan sa Enero, 2007, ngadto sa 1.5 million itandi sa 754,000 "net jobs creation" sa miaging tuig, sumala pa ni National Economic and Development Authority (NEDA) Director-General ug Socio-economic Planning Secretary Romulo Neri.

Gidugang pa ni Neri nga ang pag-panarbaho sa tanang hut-ong sa katilingban mi-usbaw karong tuiga.

Ang maong mga kasayuran nakapahimuot ni Pangulong Arroyo, samtang iyang gipaniguro nga matag lisod nga desisyon nga iyang himoon ug sa kada lagda nga iyang ipatuman gituyo alang sa pagpalig-on pagsamot sa ekonomiya ug ang girumbo niini mao lamang gayod ang pag-gama og daghang kapanarbaho-an.