Cebuano News: Presidente Arroyo midayeg sa partnership sa gobyerno, negosyante, mamumuo sa pagduso sa reporma sa ekonomiya
Manila (23 March) -- Si Presidente Arroyo midayeg sa panag-uban sa gobyerno, negosyante, ug mamumuo tungod kay miresulta kini ikatulong pinakadakong kauswagan sa suholan sa tibuok Asia-Pacific region, pagmugna sa kapin usa ka milyon nga trabaho, ug pagduso sa nasud aron makab-ot ang permanenteng pagtaas sa ekonomiya.
Sa pagpamulong ni Presidente Arroyo atol sa ika-28 nga national convention sa Employers Confederation of the Philippines kon ECOP, siya miingon nga nagbunga na karon ang panag-uban sa gobyerno, negosyante ug mamumuo.
Siya midayeg usab sa malamposon nga paglaan ug suholan sa mga mamumuo nga gibuhat sa regional wage boards diin kini nailhan nga adunay ikatulong pinakataas nga pag-usbaw sa tibuok Asia-Pacific region.
Gawas pa sa pagpausbaw sa suholan, nakamugna usab sa 1.16 ka milyon ka mga trabaho gikan sa Enero sa miaging tuig hangtod sa Enero niini nga tuig.
Si Presidente Arroyo mitataw sa iyang programang pagmugna ug trabaho diin kini naghatag sa mga palisiya aron mapadali ug mametinar ang pagtaas sa ekonomiya, lakip na ang maayong pagdumala aron pag-ingganyar sa mga mamuruhunan, pagpamuhunan sa mga inprastraktura ug pagpamuhuna alang sa edukasyon ug pag-atiman sa panglawas sa katawhan.
Sa katapusan, si Presidente Arroyo magarbohong milahad sa disiplina sa iyang administrasyon sa pagtutok sa kinatibuk-ang kauswagan sa ekonomiya ug sa pagkubos sa utang sa nasud. Siya malaumon nga ang iyang administrasyon makabalanse sa budget sa nasud sumala sa talaan. (PIA Biliran/Lanie Pitao-Tupaz) [top]
