Cebuano News: Secretary Bunye nagpahayag bahin sa surveys
by Flor Jackson
Naval, Biliran (27 March) -- Diha sa pamahayag ni Press Secretary Ignacio Bunye, siya nag-ingon nga si Presidente Gloria Macapagal Arroyo dili kandidato karong umaabot eleksyon ug tungod niini sila dili moduwa sa politika ug mga surveys.
Matod pa ni Secretary Bunye, si Presidente Arroyo ning tutok sa klaro nga misyon sa pagpalambo ug sa pag pa uswag sa ekonomiya diin kini kusog nga maka benepisyo sa mga tawo.
“Dili kami manginlabot mahitungod sa mga surveys, hinoon among palabihon nga motutok sa adlaw-adlaw nga hagit nga nag-atubang sa atong katawhan sama sa pagtang-tang sa kagutom, pag mugna ug daghang mga trabaho ug pag susi sa mga presyo sa mga pang adlaw-adlaw nga kinahanglanon”, dugang pa nga pahayag ni Secretary Bunye.
“Modawat kami ug mga negatibo nga panglantaw nga mugna sa matag adlaw nga panghitabo sa politika ug among gi-atubang kini nga mga pang lantaw sa ubay-ubay nang panahon apan amo na lang kining gihimo nga kabahin o kaparte sa presyo nga ibayad bugti sa maayo ug matarong nga panggobyernohan”, matod pa niya.
“Ang Presidente dili ma disturbo sa iyang trabaho ug ang eleksyon dili makalumping sa iyang hugot nga determinasyon sa pag human sa mga trabahoon nga iya nang nasugdan” dugang pa ni Sec. Bunye. (PIA-Biliran) [top]
