Cebuano News: May rason ngano angay magmalaomon ang mga Pilipino - Presidente Arroyo
By Lanie Pitao-Tupaz
Manila (4 April) -- Dungan sa usa ka roundtable discussion nga gipahigayon sa Malacaņang, si Presidente Gloria Macapagal Arroyo miingon nga adunay daghang rason ngano ang mga Pilipino angay magmalaomon sa pagsaka sa ekonomiya sa nasud bisan pa man sa mga hilo sa politika.
Usa sa mga hinungdan nga gihatag ni Presidente Arroyo mao ang taho sa Bangko Sentral ng Pilipinas nga misaka ang antas sa pamuyo sa mga tawo sa kaulohan ug ang iyang administrasyon maningkamot nga kini mahiagoman sa mga tawo sa probinsiya pinaagi sa paghatag kanila ug trabaho ug pakabuhian, ug pagpaubos sa presyo sa mga paraliton aron kini madaling mapalit sa mga kabus.
Si Cabinet Secretary Ricardo Saludo miingon nga ang ekonomiya sa nasud misaka sa 4.4% average samtang ang mga trabaho nga nahatag s katawhan mikabat sa 900,000 matag tuig.
Tungod niini, ang mga kabus nga Pilipino anaa na lamang karon sa 20 milyones kumpara sa 25 milyones sa tuig 2000.
Ang pagkubos sa inflation rate sa nasud mao ang resulta sa paningkamot sa gobyerno pagpaubos sa mga presyo sa pagkaon ug lain pang paraliton. (PIA Biliran) [top]
