Southern Leyte (10 April) -- Ang Commission on Elections (Comelec) gikatakdang mohimog “area visits” karong adlawa, Martes, aron pagsuta sa mga kalungsuran ug probinsiya nga angayan nilang ipa-ilawom sa ilang pag-control.

Si Comelec Commissioner Resurreccion Borra, sa iyang press briefing niadtong Lunes, miingon nga ang mga Commissioners ug uban pang mga field officers moadto sa ilang tagsa-tagsa ka mga hurisdiksyon aron personal nga mosusi sa kahimtang labot sa kahapsay ug kalinaw sa maong lugar.

Ang Comelec milihok human sa nahitabong pagpatay kang Kalinga Gubernatorial candidate Rommel Diasen ug Petronilo Amorin, Jr., ang Comelec Officer sa Palawan province.

“Ang kamandoan gikan sa Comelec en banc nagtugon sa mga field personnel sa Comelec sa pag-sumite og peace and order situation report aron maoy magsilbing giya sa Commissioner nga in-charge sa mga rehiyon,” sumala pa ni Borra.

Si Borra nagkanayon nga ang Comelec mahimong mopa-puno sa military forces nga daan nang naka-estasyon sa Kalinga ug Puerto Princesa nunot sa kamatayon nilang Diasen ug Amorin.

Kini samtang ang mga tropang military gipakatap na sa Antique province aron pagdugang sa puwersa sa kapolisan sa maong dapit, subay usab sa hangyo sa provincial election supervisor.

Sa katapusang tahu nga gipadangat sa PNP ngadto sa Comelec, nasayran nga dunay 1,479 na ka tawo ang nadakpan batok sa gun ban, dunay 1.217 ka armas moboto ang nahipos, 57 ka mga explosive devices, ug 255 ka mga deadly wseapons.