Cebuano News: Hingyap ni PGMA ang pagpamuhunan alang sa mga kabataan
By Lanie Pitao-Tupaz
Naval, Biliran (11 April) -- Si Presidente Gloria Macapagal-Arroyo nga nahilakip na sa grupo sa mga senior citizens naghingyap sa iyang pagsaulog sa ika-60 ka tuig nga adlawng natawhang niadtong miaging Huwebes Santo alang sa panaghiusa, kalamboan, ug pagpamuhunan alang sa kaugmaon sa mga kabataan.
Isip usa ka miyembro sa senior citizen, si Presidente Arroyo miingon nga angay kita mamuhunan alang sa mga kabataan ug karon ang eksaktong panahon aron atong ihatag kanila ang nasud o pag-andam sa nasud alang kanila.
Sa iyang paghisgot sa mga kabataan, si Presidente mihatag sa acronym nga MaS PARA SA KIDZ Mo nga usa ka “memory aid” alang sa mga kandidato sa administrasyon.
Si Presidente midugang nga angay kita karon mangita ug pamaagi unsaon paghatag ug maayong ugma alang sa mga kabataan, unsaon paghimo sa atong nasud nga usa ka First World country sa panahon nga ang mga kabataan karon mao na unya ang magpadagan sa atong nasud.
Si Presidente Arroyo nagsaulog sa iyang adlawng natawhan sa Baguio City samtang ang iyang gabinete mipahigayon sa ilang tinuig nga retreat.
Pagka Biyernes Santo, si Presidente Arroyo milibot sa mga simbahan alang sa tradisyonal nga Visita Iglesia sa Semana Santa. (PIA Biliran) [top]
