Manila (16 April) -- Si Presidente Gloria Macapagal Arroyo ning-adto kagahapon sa buntag sa Risen Christ Chapel nga nahimutang tapad sa Smokey Mountain sa Tondo aron pag-apil sa katapusan o ika-siyam nga adlaw sa novena, diin iya kining gipahinungod alang sa daling kaayohan sa iyang bana nga si First Gentleman Jose Miguel Arroyo.

Ang Presidente miabot alas 9:45 sa buntag ug nag-ampo sa 15 minutos nga Novena alang ni St. Faustina sa Divine Mercy, uban ang bagang duot sa katawhan labina ang usa ka grupo sa mga batan-on.

Ang misunod nga Santos nga Misa gisaulog ni Parish Priest Rev. Fr. Benigno Beltran kinsa nagpasalamat sa Presidente sa lain na sab nga higayon pag-bisita niini sa maong dapit. Nasayran nga ika-16 na kadto ka higayon pagduaw sa Presidente diha sa naasoy nga lugar.

Gipadayag usab sa Cura Paroko ang kalipay ug kahimuot sa mga lumolupyo sa maong barangay labot sa mga proyekto sa administrasyon nga gibubo diha sa Smokey Mountain area, diin gibana-bana nga dunay 3,000 ka mga pamilya ang nagpuyo.

Lakip sa mga proyektong nahuman ug napahimuslan na sa mga tawo mao ang pagbutang og tubig-mainom pinaagi sa “Patubig ni Gloria”, kabahin kini sa “Serbisyo Muna” nga tulumanon sa Pangulo alang sa mga lagyo ug mga kabus nga barangay sa bisan asang dapit sa nasud.

Mitambong usab sa Misa si DENR Secretary Angelo Reyes, ingon man pipila ka mga kandidato sa pagka-Senador sa Team Unity nga naglakip nila ni Edgardo Angara, Prospero Pichay, Chavit Singson, Tito Sotto, Cesar Montano, Vic Magsaysay, Miguel Zubiri, Sultan Kiram, ug representante ni Mike Defensor.