Cebuano News: PGMA: Paglambo sa ekonomiya nag-gumikan sa “tough fiscal reforms” sa gobyerno
Southern Leyte (17 April) -- Ang presko ug pabor nga panglantaw sa nasudnong ekonomiya nga gipakita diha sa ubos nga interest ug inflation rate misangpot sa bag-ong pagsalig sa mga tigbubu og puhunan ingon man paglig-on sa peso.
Kini ang gibutyag ni Pangulong Gloria Macapagal Arroyo kagahapon sa usa ka roundtable discussion niya ug ni National Economic Development Authority (NEDA) Director-General Romulo Neri didto sa Malacanang.
Matud sa Pangulo nga kining pag-lig-on sa ekonomiya maoy resulta usab sa malisod nga mga desisyon nga gipatuman sa kagamhanan, labina ang balaod sa Expanded Value Added Tax (E-VAT).
Pinaagi sa EVAT ang bayranan sa VAT gipasakaan gikan sa 10% ngadto na sa 12%, ug gi-apil na usab ang kanhi VAT-exempt nga mga butang, sama sa gasoline ug mga luho nga sakyanan ingon sa mga Sports Utility Vehicles (SUVs).
Ang kagamhanan nakahipos og igong pundo sa nagapadayong pagpatuman sa EVAT, ug kini giliwa ra sab alang sa mga nag-unang galastuhan sama sa mga proyekto sa infra-estruktura, ug mga serbisyo sa panglawas ug edukasyon, sa wala nay panginahanglan nga mangutang pa sa gawas, nagkanayon si Presidente Arroyo.
Dugang pa niana, ang gobyerno nakahimo usab pagtanyag og mga “soft loans” ngadto sa mga Filipino Entrepreneurs pinaagi sa Small and Medium Enterprises (SMEs) program diin nakapatukod na sila sa ilang kaugalingong mga negosyo.
Ang International Monetary Fund naka-alinggat ning maayong kalambuan, hinungdan nga gi-isa nila ang panag-an nga ang economic growth sa nasud nagdto sa “higher than average” itandi sa mga silingang kanasuran sa Asya.
Bisan ang World Bank, sa Philippine Economic Monitor niini, mitag-an og tulo ka tuig sunod-sunod nga ekonomikanhon nga paglabong sa nasud -- labing una kining “prediction” gibuhian sa WB alang sa nasud ug sa Rehiyon sa Asya sukad sa tuig 1970, timaan sa ilang kompyansa sa liderato ni Pangulong Arroyo. (PIA-Southern Leyte) [top]
