by Rey Anthony Chiu

Tagbilaran City (19 April) -- LAYOG nga kaugmaon ang nakita sa mga tag-iyahan og kalubihan karon nga misulbong na ang pangkalibutang panginahanglan sa mga produktong gikan sa lubi.

Kini samtang mibutyag ang United Coconut Association of the Philippines nga ang mga natural nga sangkap gikan sa lubo, sama sa pag-export sa lana alang sa sabon ug shampoo mipasulbong ngadto na sa $34.7M niadtong milabayng tuig.

Sa 2006, dili momenos sa 10 la produktong gikan sa lubo ang mikita oglabing menos $1M, matud sa mga tinubdan sa kahugpungan.

Labing himalitan ang glycerine, nga mikita og $8.07 miliones. Ang glycerine sangkap sa tambal, mga hiso sa lawas, ilimnon ug lawog sa baboy, ug kini giangkat sa United States, China, New Zealand, South Korea ug laing 18 ka nasud.

Ang exports sa sabon nga gihimo gikan sa lana sa lubi mihipos og $8.01M nga gipalit sa Indonesia, United Arab Emirates, Singapore, Malaysia, Taiwan ug laing 58 ka nasud.

Ang pinolbos nga tono sa lubi mihipos usab og $6M.

Ang shampoo nga hinimo ginamit ang tono sa lubi ug nata de coco maoy nagpabilin'g usa sa labing gipangita nga produkto sa Pilipinas samtang ang tono mihipos lamang og $2.2M.

Ang gikagubtang virgin coconut oil mitaas pa sa 2006, ug bisan sa iyang kabag-o pa lamang sa merkado, mitigum na kini og $1.5M gikan sa US, Canada ug South Korea.

Dugang pa, ang exports sa bunot alang sa paghimo og kagamitan sa balay ug laing industrial nga panginahanglan mitigum usab og $1.1M nga gitunol sa mga mamalitay sa China, Taiwan ug South Korea.

Dinhi sa Bohol, padayon nga mituo ang mga tinugyanan sa Philippine Coconut Authority nga ang kalubihan mas daghan pa og gamit kay sa pagputol niini aron himoong tabla ug lumber.