Cebuano News: Gikasakit ni Sec. Gonzalez ang pagpanghilabot sa mga langyaw
by Rey Anthony Chiu
Tagbilaran City (24 April) -- AGI og reaksyon sa hangyo sa mga delegados sa Inter-Parliament Union (IPU) nga gamiton ang iyang nahuptang gahum aron palingkawason ang nabilanggong lima ka mga militanteng magbabalaod nga sakop sa mga party list, mibutyag si Justice Secretary Raul Gonzalez nga iyang gikasakit ang pagpanglabut-labot sa mga langyaw sa dagan sa korte sa nasud sa Pilipinas.
Una na nga gikwestyon sa mga delegados sa IPU ang sistema sa pamalaud sa nasud tungod sa pagkabilanggo ug pagdetinir sa mga aktibistang magbabalaod.
Gikatigum ni Gonzales sa Department of Justice sa Manila sila Kalihim sa IPU Anders Johnsson, Senador Sharon Carstairs, IPU Committee on the Human Rights of Parliamentarians Vice President ug committee secretary Ingeborg Schwarz.
Matud ni Gonzalez, ang mga delegado mipadayag sa ilang kabalaka sa lima, lakip na si Rep. Satur Ocampo, kinsa sama ni Crispin Beltran, gisumbong sa sala nga paglaraw pag lumpag sa Presidente sa nasud.
Ginamit ang ehemplo ni Ocampo, natingala, matud pa ang mga delegados, ngano nga si Beltran padayong natanggong sa bilangguan samtang si Ocampo gibuhian na man.
Pasabot ni Gonzalez sa IPU, si Ocampo midangop sa Korte Suprema ug mao nga siya gipa-pyansa, apan si Beltran pakyas sa iyang hangyo sa Korte.
Mituo ang IPU nga isip Kalihim sa Justice Department, mahimong gamiton ni Gonzales ang iyang gahum pagbuhi kang Beltran.
Hinuon, iyang gipasabot nga ang hisgutanan, tua na sa Korte nga dunay integridad ug wala na kini sa iyang mga kamut. (PIA) [top]
