Cebuano News: Balaud batok sa terorismo igo na nga tubag sa pagpamatay - Ermita
By Rodrigo S. Victoria
Naval, Biliran (26 April) -– Si Executive Secretary Eduardo Ermita nagkanayon kagahapong adlawa nga ang anaa nga balaud batok sa terorismo igo na nga tubag sa sunod-sunod nga pagpamatay ug kagubot nga may kalabtanan sa eleksyon sa nasud.
Sa iyang regular nga press briefing sa Malacañang kagahapon sa hapon, si Ermita mibalewala sa kagustuhan sa uban nga mga grupo alang sa pagpabalik ni Presidente Gloria Macapagal Arroyo sa balaud sa silot sa kamatayon human sa pagkuyanap sa wala pa matukib nga pagpamatay ug kagubot sa politika.
“Wala sa akong huna-huna nga kadto nga mga butang igo alang sa Presidente sa paghuna-huna mahitungod sa pagwagtang sa silot sa kamatayon ilabi na nga sa pagkakaron aduna na kitay balaud batok sa terorismo. Kini dako kaayo ug ikatabang sa pagtubag kung aduna man gani pagsaka sa krimen,” matud niya.
Si Ermita mihimo sa maong pamahayag diha sa mga taho sa sunod-sunod nga pagpamatay ug ang alegasyon nga ang Pilipinas sa pagkakaron mao na ang agianan sa mga ginadili nga droga.
“Ang balaud batok sa terorismo adunay igo nga ngipon sa pagharong sa tanang magbuhat ug krimen,” iya kining gitumbok.
“Bisan pa ang nasud adunay silot sa kamatayon, bisan pa kini may sentensya nga tibuok kinabuhi o bug-at nga penalidad, kadto nga mga butang magdepende kung unsa ang gisulti sa mga libro sa balaud,” siya nagkanayon.
“Ato na lang kining biyaan sa ingon ana. Bisan pa kung unsa nga penalidad, aduna pa gihapoy probisyon sa libro sa Konstitusyon nga ang Presidente adunay libre nga gahum sa pagkonsiderar sa paghatag ug executive clemency. Sa katapusan, bisan pa may silot sa kamatayon, kini pwede pa mapakunhod,” dugang pa niya. (PIA-Biliran) [top]
