Cebuano News: Dimiao-Tagbilaran-Calape road section isubo atbang sa Katedral
by Rey Anthony Chiu
Tagbilaran City (9 May) -- SAMTANG subhan ugma ni Presidente Gloria Macapagal Arroyo ang ikaduhang bahin sa Bohol Circumferencial Road Improvement Project (BCRIP) sa iyang paghidangat sa Jagna, himoon usab ang pagtukas sa BCRIP project marker dinhi sa kilometer 0 atbang sa Cathedral ni San Jose sa may alas 3 sa palis.
Hinuon dili na ikauban ang Presidente sa kalihukan sa Tagbilaran.
Ang Presidente moadto sa Jagna ugma aron subhan ang gipalapdan nga pantalan ug susihon ang BCRIP 2 sa Candijay-Jagna-Velencia section.
Sanglit duna pay lain nga lakaw ang pamuno nasud, aron ilusad ang usa ka Information technology Center sa Sugbo, dili na siya makatambong sa kalihukan sa Tagbilaran.
Usa ka memorandum nga giluwatan ni Gobernador Erico Aumentado pinirmahan Mayo 4 ang nagmandu sa mga empleyado sa mga buhatan sa kagamhanan pagtambong sa kalihukan sa Plaza. Didto ilang saksihan ang pagtukas sa tabon sa project marker nga tukoron atbang sa Kapitolyo alang sa proyekto.
Ikauban sa mga opisyales sa maong kalihukan mismo si Department of Public Works and Highways Acting Secretary Manuel Bonoan ug si Japanese Ambassador Ryuichiro Yamazaki.
Si Ambassador Yamazaki maoy magrepresentar sa kagamhanan sa Japan, kinsa maoy nagpahulam sa pundo nga gigamit pagtukod sa nahisgutang sementadong agianan.
Ang BCRIP 2 gibahin sa duha ka kontrata. Ang pagabuksan sa Tagbilaran mao ang Dimiao-Tagbialaran-Calape section nga mikabat sa 84.24 kilometros ug nagkantidad og halos usa ka bilyon samtang ang gisubhan sa pangulo sa nasud mao ang Candija-Jagna Valencia section. (PIA) [top]
