By Lanie Pitao-Tupaz

Manila (9 May) -- Ang gobyernong Pilipinas nakiglambigit na sa mga otoridad sa Nigeria alang sa luwas nga pagpabuhi sa walo ka mga OFWs nga gikidnap sa Nigeria.

Ang Department of Foreign Affairs kon DFA nakiglambigit na usab sa Daewoo Engineering and Construction, usa ka kompanya sa South Korea diin empleyado ang mga biktima.

Matod pa sa taho, misulod ang mga armadong lalaki didto sa Daewoo campsite duol sa Port Hartcourt sayo sa buntag niadtong miaging Huwebes ug misikop sa mga trabahador uban ang tulo ka mga South Korean.

Nagkapinusilay makadali ang mga armadong lalaki ug ang mga segurity guards apan walay gikatahong nasakitan.

Walay miangkon nga responsible sa pagpangidnap.

Gibalhin dayon sa Philippine Embassy ang nahibiling 45 ka mga Pilipinong trabahador ngadto sa usa ka hotel pagkatapos isara ang campsite sa Daewoo.

Ang Manila mimando sa madaliang paghikay sa mga papeles sa mga trabahador aron sila mapabalik sa nasud.

Si Foreign Affairs Undersecretary Esteban Conejos miingon nga andam ang gobyerno pagpauli sa mga trabahador nga Pilipino nga atua sa Nigeria kung ilang nabatyagan nga nameligro ang ilang kinabuhi didto.

Siya miawhag sa mga Pilipinong atua sa Nigeria pag-contact lamang sa mga opisyales sa embahada sa pinakamadaling panahon.