Tacloban City (10 May) -- By Rodrigo S. Victoria

Naval, Biliran (10 May) -- Si Presidente Gloria Macapagal Arroyo nagmando sa Philippine National Police (PNP) ug sa Armed Forces of the Philippines (AFP) sa pagpahigayon ug hiniusang pagpatrolya ug pagcheckpoints aron mapakgang ang maut nga mga elemento sa paghimo ug kasamok sa malinawon nga pagpahigayon sa Mayo 14 nga piniliay, matud pa ni Executive Secretary Eduardo Ermita kagahapong adlawa.

Si Ermita mibutyag niini diha sa iyang senemana nga media briefing sa Malacañang human sa insidente sa pagpamomba sa syudad sa Tacurong, Sultan Kudarat niadtong Martes nga adlaw diin kini mikalas ug upat ka mga kinabuhi gawas lang sa pagkasamad sa sobrang 30 ka lain nga mga tawo.

Tungod kay walay bisan usa nga miangkon nga responsable sa maong pagpamomba ug diin ang mga otoridad anaa pa sa ilang mga pag-imbestigar, si Ermita nagkanayon nga si Presidente Gloria Macapagal Arroyo nagmando sa mga pwersa sa seguridad sa gobyerno sa paghimo sa ilang katungdanan nga gilaan ubos sa mando sa Commission on Elections (Comelec), nga mauy gitukahan sa pagdumala sa pagpahigayon sa matinud-anon, hapsay ug malinawon nga piniliay.

“Ang mando sa Presidente mao nga maseguro nga ang susamang mga panghitabo dili na mahitabo bisan diin sa Pilipinas ilabi na ang mga terorista ug uban pa nga maut nga mga elemento may kapabilidad sa pagsamok sa malinawon ug hapsay nga pagpahigayon sa piniliay” matud pa ni Ermita.

Kalakip sa kamanduan, siya nagkanayon, ngadto sa PNP ug AFP “ sa pagpahigayon ug hiniusang pagpatrolya ug pagcheckpoint sa tibuok nasud.”