By Rodrigo S. Victoria

Manila (10 May) -- Si Presidente Gloria Macapagal Arroyo nagpasalamat ug nagpahalipay kagahapong adlawa sa gobyerno sa Nigeria sa ilang malampuson nga mga paningkamot nga mauy naggiya ngadto sa hinanali nga pagbuhi sa walo ka mga trabahanteng Pilipino gawas sa nasud (OFWs) nga gisakmit sa milabay nga semana sa mga militante sa dapit nga gitukuran sa usa ka planta sa kuryente.

Si Executive Secretary Eduardo Ermita nagkanayon sa iyang regular nga senemana nga press briefing nga base sa talaan nga gihatag sa iya ni Foreign Affairs Undersecretary Esteban Conejos, ang walo ka mga trabahante didto sa gawas sa nasud gibuhian sa mga alas-12:00 sa tungang gabii niadtong Martes oras sa Nigeria (mga alas-singko sa hapon oras sa Manila).

“Silang tanan anaa sa maayong panglawas,” matud pa ni Ermita, midugang nga ang pagbuhi sa mga trabahante nga Pilipino gidala gikan sa Port Harport ngadto sa Lagos, Nigeria ug gipaabot nga pagadalhon balik sa Manila sa Biyernes sa buntag.

Siya nagkanayon nga ang hinanali nga pagbuhi sa mga biktima resulta sa hugot nga koordinasyon tale sa gobyerno sa Pilipinas ug Nigeria ug ang kompaniya sa Daewoo, establisamento sa Korea nga mikontrata sa mga serbisyo sa walo ka mga Pilipino.

Si Ermita mitataw nga walay gibayad nga salapi alang sa ilang kagawasan.

“Ang kasagaran nga himuon mao nga dili mi makigsabot, wala mi mobayad ug salapi alang sa ilang kagawasan. Ang kompaniya nga mauy mikontrata sa ilang serbisyo ang mauy naghimo sa mga pakigsabot,” mauy paglinaw ni Ermita.

Ang nag-unang tigpatukod sa South Korea nga Daewoo Engineering and Construction diha sa lugar sa Nigeria may kinatibuk-ang 53 ka mga trabahante nga Pilipino.