Cebuano News: Bunye miduso sa pag-computerize na sa piniliay
Manila (21 May) -- Tulo ka tuig gikan karon ug sa taliabot nga eleksyon karong 2010 igo na nga panahon aron ang Commission on Elections (Comelec) mopasiugda na sa mga gikinahanglan nga kabag-ohan sa bugnong lugaynon, ilabina gayod ang pagpahigayon og computerized elections, nagkanayon si Press Secretary ug Presidential Spokesman Ignacio Bunye.
Apan aron mahitabo kining "milagro" nga gitawag "automated elections" kinahanglan nga ang tanang katawhan magkahiusa pagtuboy sa atong sistema sa piniliay ngadto na sa usa ka "state-of-the-art democratic exercise," matud pa ni Kalihim Bunye sa iyang senemanang linddog "View from the Palace" nga gikatakdang mogawas karong adlawa, Mayo 21.
Matud ni Bunye nga ang administrasyong Arroyo andam ug tagana mo-atubang sa hagit alang sa electoral reforms. "Atong lauman nga ang naasoy nga mga kabag-ohan mahimong tipik ug kabahin sa mga kahimoan pagpanday sa atong nasud, ug busa angay nga paluyohan kini sa mga lain-laing sector ug mga political parties," sumal pa ni Bunye.
Siya miingon nga sa Medium-Term Philippine Development Plan ni Pangulong Arroyo nga nagdala sa angga BEAT THE ODDS, gitumbok nga ang automated elections importante kaayo alang sa political stability sa nasud.
Ang mga naandang problema matag eleksyon sama sa kalisod pagpangita sa presento, kapoy ug hago nga mga maestro, tikas, ug hinay nga ihap masulbad kon pinaagi na unya sa computer ang pagboto sa mga tawo, dugang pasabot ni Kalihim Bunye. (PIA-Southern Leyte) [top]
